Што значи да градиш иднина кога тлото под твоите нозе постојано се поместува?
heartquake на Екин Тунчели
5 декември 2026 · Чифте амам, Скопје · 20:00 часот
Времетраење: 42 минути
Инспирирана од политичката и географската реалност на Турција, претставата heartquake поаѓа од односот меѓу луѓето и земјата на која живеат. Оттаму, делото отвора пошироко размислување за неизвесноста, кревкоста и напорот да се продолжи понатаму кога она што дотогаш ни давало чувство на сигурност почнува да се распаѓа.
Како да замислуваш иднина кога постојаните потреси го менуваат она за што си сонувал? Во земја каде што луѓето растат со приказни за древни градови уништени од земјотреси, како да градиш нешто кога знаеш дека еден ден може да биде срушено? Дали, како Сизиф, продолжуваш да го туркаш каменот нагоре по ридот, само за тој одново да се стркала надолу?
Во сржта на делото стои едно едноставно, но итно прашање: кога сè околу нас се руши, што ни останува освен поддршката што си ја даваме едни на други?
Гостувањето на претставата во Скопје има особена симболика. Историјата на градот е обележана од разорниот земјотрес на 26 јули 1963 година и долгиот процес на обнова што следувал. Во овој контекст, heartquake отвора простор за размислување за тоа како искуствата од разурнувањето остануваат врежани во индивидуалната и колективната меморија, но и за човечката способност одново да се гради живот среде неизвесноста.
Во својот кореографски јазик, Тунчели ги преточува телесните искуства во слоевити, поетски форми. Делото е создадено во соработка со Гизем Сечкин, Дирен Езги Јилдизкан, Халил Ибрахим Ајгун и Уфук Факиоглу, а го изведуваат Бариш Дикер, Дирен Езги Јилдизкан и Гизем Сечкин.
Кореографија и концепт: Екин Тунчели
Создадено во соработка со: Гизем Сечкин, Дирен Езги Јилдизкан, Халил Ибрахим Ајгун и Уфук Факиоглу
Изведувачи: Бариш Дикер, Дирен Езги Јилдизкан и Гизем Сечкин
Звучна подлога, вклучувајќи музички дела од: Ah! Kosmos, Ekin Tunçeli, Cucina Povera & Haron, Dinamarca
Уметничка супервизија: Џенифер Лејси и Стина Ниберг
Супервизија на звук: Бариш Бингол
Костимографија: Мерт Јемениџиоглу
Дизајн на светло: М. Али Донмез
Посебна благодарност од авторите до: MAKOR people & Jennifer Lacey, Zorlu PSM, Çıplak Ayaklar Kumpanyası, Halil İbrahim Aygün, Büşra Tuna, Ufuk Fakıoğlu, Melih Kıraç, Beste Demir, Martin Siewke; Zeynep & Irmak Kuyumcu, KHAS Film ve Drama, MSGSÜ Modern Dans ASD., ÇATI Dans, Akbank Sanat, Exanimo house, Güneşülkesi Sanat за обезбедување простор за проби
Претставата премиерно е изведена во MDT во Стокхолм (Шведска), а досега гостувала и на: Moussem Cities: İstanbul Festival во KaaiStudios (Брисел, Белгија), ARTER İstanbul (Турција), Fringe İstanbul Festivali – Alan Kadıköy İstanbul (Турција), Zorlu PSM İstanbul %100 Studio (Турција), What’s Next Festival во Лимерик (Ирска), Take Off Festival во Корк (Ирска) и Paribu Art во Истанбул (Турција).
Повеќе за претставата: ekintunceli.com/works/heartquake
Резиденцијата heartquake – „Кореографско истражување на животот на нестабилно тло“ е поддржана од Европскиот фонд за фестивали за млади уметници (EFFEA), иницијатива на Европската фестивалска асоцијација (EFA), кофинансирана од Европската Унија.




