
Танц Фест, под уметничко водство на Рисима Рисимкин, е основан во 2005 година како единствен фестивал за современ танц во Македонија. Од самиот почеток, фестивалот стана препознатлив по квалитетот на програмата и по својата силна мисија и визија. Тој е мост меѓу Македонија и светот, можност за уметниците да комуницираат и место каде секој може да биде тоа што е.
Мисијата на фестивалот беше и останува насочена кон создавање силна врска со уметници од различни земји и култури и да им се даде можност да работат заедно. Тоа е основа врз која се градат двонасочни и долгорочни односи во танцот.
Во последните 22 години, низ фестивалските сцени помина „армија“ танчери, на повеќе различни сцени во Скопје: Македонски народен театар, Македонска опера и балет, Младински културен центар, Сцена ЗЕБРА, како и Народните театри во Велес, Битола и Штип.
Компании како Netherlands Dance Theater, Scapino Ballet Rotterdam, Galili Dance Company, Rotterdam Dance Academy (Холандија); националните балети од Лисабон (Португалија); Печ (Унгарија); Белград (Србија); Љубљана (Словенија); Истанбул, Анкара, Анталија, Измир (Турција); Martha Graham Dance Company, Megan Bridge со Friget Dance Company, Christina Bonansea, Battery Dance Company, Philadanco!; Kafig Dance Company на Mourad Merzuki, Pokemon Dance Company, Amala Dianor Dance Company и Realite Dance Company (Франција); State Ballet Hildesheim и Steptext Dance Project (Германија); Katsura Kan Butoh Company (Јапонија); Bely Theater, Санкт Петербург (Русија); ARA Dance Company (Латвија); National Opera and Drama Dance Theater, Dragon Kung Fu Contemporary Dance Company и Nine Contemporary Dance Company од Пекинг (Кина); Zagreb Dance Theater (Хрватска); Национален балет и Скопје Танцов Театар (Македонија); Dance Company of Zurich University of the Arts (Цирих, Швајцарија); Ljubljana Dance Theatre и многу други ги презентираа своите дела и оставија силен печат врз развојот на современата танцова сцена во Македонија.

Управниот одбор на фестивалот, составен од врвни уметници, интелектуалци и новинари, ја доделува наградата „МЕНАДА“ за животно дело во областа на танцот, во чест на сите големи танчери кои оставиле свој печат во развојот на танцот и балетот како уметничка форма во Македонија.
Добитници на ова признание се основачите на Националниот балет: Ѓорѓи Македонски, Натка Пенушлиска, Олга Милосавлева, потоа Ирена Ветерова, Татјана Петковска, Елисавета Кушовска, Екрем Хусеин, Емилија Џипунова и Јагода Сланева, но и значајни имиња од светската танцова сцена како Владимир Василиев – балетска легенда на 20. век; Градимир Панков – уметнички директор на „The Grand Ballets Canadiens“; Ханс ван Манен – еден од најголемите кореографи во модерниот балет; Милко Шпаремблек – исклучителен светски познат кореограф од Хрватска; Дидие Дешамп (Франција); Жао Си (Кина); Џоан Мајер Браун (САД); Каролин Карлсон (Франција/САД) и Марта Греам (САД).
Од 2014 година, Танц Фест во својата програма го вклучува интернационалниот натпревар за млади кореографи „ТАНЦЛАБ“, кој привлекува многу млади кореографи од Европа и светот. Натпреварот е биенален, а жирито го сочинуваат значајни експерти од целиот свет.

Покровители, партнери и пријатели на фестивалот
